.png)
दैलेख – नारायण नगरपालिकाले ‘सशक्त महिला समृद्ध नेपाल’ परियोजना क्रियाकलापलाई सघाउन अधिकारकर्मीलाई लैंगिक उत्तरदायी र समावेशी शासन प्रवर्द्धन सवालमा २ दिने सामाजिक उत्तरदायित्व तालिम सञ्चालन गरेको छ । परियोजनाको साझेदार महिला पुनर्स्थापना केन्द्र (ओरेक)को प्राविधिक सहयोगमा सञ्चालित तालिममा २१ जनाको सहभागिता रहेको छ ।
सामाजिक उत्तरदायित्वसंग जोडिएका पारदर्शिता, अर्थपूर्ण सहभागिता, लैङ्गिक समानता तथा सामाजिक समावेशीकरण नीति र समावेशीकरण, स्थानीय तहको योजना निर्माण प्रक्रिया र उत्तरदायित्व, सार्वजनिक सेवामा महिला तथा आमनागरिकको पहुँच अभिबृद्धिका लागि नागरिक समाजको पैरबी सवालमा सहभागीहरुलाई अभिमुखीकरण गरिने जनाइएको छ ।
‘सशक्त महिला समृद्ध नेपाल’ परियोजना र सामाजिक उत्तरदायित्व सवालमा अधिकारकर्मी रमा भण्डारीले सहजीकरण गरिरहनुभएको छ । महिला पुनर्स्थापना केन्द्र (ओरेक) काठमाण्डौंका कार्यक्रम संयोजक कमला पोखरेल, कर्णाली प्रदेश संयोजक डिलकुमारी बुढामगर र आयोजक नारायण नगरपालिकाका सामाजिक शाखा प्रमुख खमबहादुर थापाले तालिम संयोजन गर्नुभएको हो ।
आर्थिक, सामाजिक तथा राजनीतिक अधिकार प्रवद्र्धन सहित महिला सशक्तिकरणलाई टेवा दिने ‘सशक्त महिला समृद्ध नेपाल’ परियोजना यूरोपियन यूनियनको सहयोगमा संयुक्त राष्ट्र संघका ४ वटा निकायहरु यूनिसेफ, यूएनएफपीए, यूएनउमन र आईएलओसंगको सहकार्यमा स्थानीय गैससहरुसंग साझेदारीमा विभिन्न प्रदेश र पालिकाहरुमा सञ्चालित छ ।